Reglur varðandi sundhald háð hitastigi vatns o.fl. fyrir lengsta sundið og svo hlutfallslega hliðstætt varðandi hinar vegalengdirnar !

2.500 m ....................... Lágmarkshiti  vatnsins 13.5°c

1.250 m ....................... Lágmarkshiti  vatnsins 12.5°c

900 m .......................... Lágmarkshiti vatnsins 11.7°c

Sundi aflýst ……………... Hitastig vatnsins undir 11.7°c

Auk vatnshita þá er dagana fyrir sund / á sunddegi tekið tillit til (áætlaðs) veðurs, þ.e. lofthita, vinds, sólfars/skýja. Þá meta mótshaldarar hvort summa þessara þriggja þátta verði til frekari styttingar sundsins, en það sem vatnshitinn einn sker úr um. Ennfemur geta mótshaldarar þá metið mjög hagstæð veðurskilyrði á móti óhagstæðum vatnshita s.s. þannig að logn, sól og t.d. 18°c á sunddegi gæti hugsanlega rýmkað ofangreinda töflu.

Kæru sundáhugamenn um land allt !

Nú er skráning hafin í Urriðavatnssundið 2024.  Það mun að öllu forfallalausu fara fram 27. júlí 2024.

Smellið á hnappinn hér fyrir ofan til að skrá ykkur.  Athugið að við tökum eingöngu við greiðslu með millifærslu í banka.  Þið fáið svarpóst þegar þið hafið skráð ykkur með öllum nauðsynlegum upplýsingum.

F. h. undirbúningsnefndar

Þórunn Hálfdanardóttir

Langar ykkur að taka þátt í skemmtilegum íþróttaviðburði og prófa eitthvað nýtt? Ef svo þá hvet ég ykkur til að taka þátt í Urriðavatnssundinu sem haldið er ár hvert í Urriðavatni nálægt Egilsstöðum. Öll umgjörðin í kringum sundið er til fyrirmyndar og vel staðið að öllum öryggismálum. Hægt er að velja um 3 vegalengdir þannig að öll geta fundið eitthvað við sitt hæfi. Ég hef bæði synt í spegilsléttu vatninu og í vindi og öldugangi en upplifunin er alltaf jafn stórkostleg að loknu sundi.

Ég hvet öll til að skrá sig og taka þátt. Þið sjáið ekki eftir því.

Sumurin 2011 og 2012  synti ég svokallað Vansbrosund í Svíþjóð. Það  er 3 km langt,  fyrst 2 km. niður hina lygnu Dalelven og svo 1 km upp þverá hennar, Vanån.  Ég heillaðist af vatninu,  hvetjandi áhorfendum, fólki í bátum sem gætti okkar sundfólksins og allri umgjörð sundsins. Í fyrra skiptið dagdreymdi mig um að stofna til svona sunds heima á Héraði. Í seinna skiptið vissi ég á mótum ánna tveggja að slíkt sund ætti að vera í Urriðavatni.  Þegar heim kom setti ég mig í samband við Guðmund Davíðsson yfirmann Hitaveitu Egilsstaða og Fella (HEF) og þau Steinunni Ingimarsdóttur og Kjartan Benediktsson í björgunarsveitinni Hérað sem leist vel á hugmyndina. Ég ræddi við landeigendur á Urriðavatni sem tóku hugmyndinni vel og í ljós kom að Urriðavatnssund var í raun þegar til. Eiríkur Stefán Einarsson frá Urriðavatni hafði þá þegar synt vatnið endilangt og hugðist gera að venju. Það voru öðru fremur velvilji landeigenda og Eiríks Stefáns ásamt með tilstyrk HEF og björgunarsveitarinnar Héraðs sem gerðu fyrsta opinbera Urriðavatnssundið að veruleika 27.júlí 2013 og síðan verið árlega nema hvað það féll niður sumarið 2021 vegna Covid.

Pétur Heimisson

Mynd: Hilmar Gunnlaugsson og Pétur Heimisson

Skipuleggjendur Urriðavatnssunds hafa það að markmiði að halda sundið á hverju ári og alltaf sömu helgina, á laugardegi, síðustu helgi fyrir Verslunarmannahelgi. Allt skipulag og framkvæmd sundsins byggir á vinnu sjálfboðaliða og þar er aðkoma Björgunarsveitarinnar Héraðs stærst. Öll öryggismál tengd sundinu lúta skipulagi björgunarsveitarfólksins sem líka sinnir öryggismálunum að langmestu leyti.

Reynslan hefur kennt okkur að til þess getur komið að aflýsa þurfi sundinu en það gerðist árið 2020 vegna Covid. Þá var hægt að aflýsa því með löngum fyrirvara þannig að skráning hófst aldrei. Aðrar aðstæður gætu orðið til þess að aflýsa þyrfti sundinu með stuttum fyrirvara, jafnvel mjög stuttum. Útlit var fyrir það fyrir nokkrum árum en þá var það alvarlega í skoðun hjá okkur skipuleggjendum síðustu klukkustundirnar fyrir sundið að aflýsa því vegna mikils hvassviðris en það slapp til í það skiptið.

Enn eitt sem líkt og Covid og hvassviðri gæti ógnað öryggi sundmanna er sá möguleiki að björgunarsveitarfólk verði kallað í raunverulegar björgunaraðgerðir og geti því ekki annast gæslu og öryggismál við sundið. Við slíkar aðstæður gæti þurft að afslýsa því með stuttum fyrirvara.

Skipuleggjendur sundsins áskilja sér rétt til þess að aflýsa sundinu með lengri, styttri eða mjög stuttum fyrirvara við aðstæður eins og að ofan eru raktar og af öðrum ástæðum sem þeir meta þannig, Þá og þegar í hugsanlegri framtíð.

Ef sundinu er aflýst þegar 2 vikur eða meira eru til sunds þá verður skráningargjald endurgreitt að fullu. Komi til þess að aflýsa þurfi sundinu þegar minna en tvær vikur eru til sunds, verður skráningargjaldið endurgreitt, nema umsýslugjald sem í sundinu árið 2021 nemur kr. 3000.- 

Skipuleggjendur Urriðavatnssundsins

Skipuleggjendur sundsins ráðleggja sundmönnum að nota búnað sem ætlað er að halda á manni hita; sundgalla og gjarnan hettu, hvorutveggja úr neoprane. Einnig má nota vettlinga og sokka sem miða að því sama. Mikilvægt er að galli passi vel og að gefnu tilefni er sérstaklega bent á of stór galli kælir beinlínis því nýtt vatn kemst þá sífellt milli búnings og líkama. Þá má galli ekki þrengja um of að brjósti enda mikilvægt að létt sé að anda.

Búnað má t.d. kaupa í GG Sport Gummibátar & Gallar, Ellingsen og víðar.

Skylda er að nota sundhettu sem sundmaður fær afhenta fyrir sundið.

Ekki má nota neinn þann búnað sem ætlaður er til að auka hraða s.s. hvers konar sundfit, blöðkur eða spaða, hvort sem er á hendur eða fætur.

2500 metrar - Landvættasund

Ræst er sunnanvert úr víkinni (Hitaveitu- eda Volgruvík) sunnan við Hitaveitutangann og synt fyrir hann, beygt til norðurs og umhverfis bauju sem er í vatninu nærri Bræðratanga.  Svo er synt til baka fyrir tangann og inn í víkina norðanverða.  Þar er markið.   Sundið er um 2500 metra langt.

1250 metrar - Hálft Landvættasund

Ræst er sunnanvert úr víkinni (Hitaveitu- eda Volgruvík) sunnan við Hitaveitutangann og synt fyrir hann, beygt til norðurs og umhverfis bauju sem er á miðri 2500 m brautinni.  Svo er synt til baka fyrir tangann og inn í víkina norðanverða.  Þar er markið.   Sundið er um 1250 metra langt.

500 metrar - Ungmenna- og skemmtisund

Ræst er sunnanvert úr víkinni (Hitaveitu- eða Volgruvík) sunnan við Hitaveitutangann, synt út fyrir bauju sem er um 250 m úti á víkinni og synt til baka  í mark í norðanverðri víkinni.  Leiðin er um 500 m löng.

Kæri sundmaður – öryggi þitt kallar á ramma og reglur !

Við leggjum mikið upp úr öryggi þínu og annarra á sundstað. Björgunarsveitin Hérað fer með yfirumsjón og stjórn öryggismála.

Það er skylda að nota sundhettu sem afhent er fyrir sundið og æskilegt er að sundmenn noti búnað sem ver þá gegn kulda, þ.e. sundgalla og ef vill hettu.

Björgunarsveitarfólk verður með báta á vatninu og í landi eru mannaðir varðturnar/varðstöðvar og talsamband er á milli báta og þeirra

Vilji sundmaður aðstoð af einhverju tagi getur hann t.d. lyft hönd, veifað og einnig hrópað. Tímalengdin sem menn eru í vatninu skiptir máli gagnvart öryggi, sérlega ef vatnið er kalt. Þeir sem þreyta lengsta sundið þurfa að geta lokið því á 1,5 klukkustund. Ef menn ná því ekki þá mega björgunarsveitarmenn stöðva sundmann. Ennfremur geta björgunarsveitarmenn fyrr stöðvað þá sem greinilega eru uppgefnir. Þá þjálfa menn betur og koma fílefldir að ári.

Gerum þetta skemmtilegan dag og gangi þér vel á sundinu,

Skipuleggjendur Urriðavatnssunds